இசை

ஆரோகண அவரோகணமாய்

ஓடி வந்து கால் நனைத்து

உள்வாங்கும் கடலலைகள்

சரளி வரிசையும் சரளமாய் அறியாத

சாதாரணனின் பாதத்தையும்

சன்னமாய்த் தீண்டும்

தள்ளுவண்டியில் சுண்டல்காரர்

கரண்டியைச் சட்டியின் ஓரங்களில்

அடித்து எழுப்பும் ஓசை

தாளம் தப்பாத தனியாவர்த்தனமாய்ச்

செவிகளை நிரப்பும்

ஆர்ப்பரிக்கும் அலைகளின்

ஆனந்த தாண்டவம்

அரங்கேற்றமாய் உருவெடுக்கும்

புல்லாங்குழல் விற்கும் வடகிழக்கு ஆசாமி

இந்தியையும் தமிழையும் இணைத்து

எழுப்பும் மெட்டு

பத்து ரூபாய்க்கும் பசிக்குமான போராட்டமென்று

அவரது

கண்கள் பிரதிபலிக்கும்

இவையனைத்தும் கேட்காமல்

கருவிகளைக் காதில் பொருத்தி

செவிப்பறை கிழிக்கும் செவ்வியல் இசை

கேட்டுச் செல்கிறான்

இசையின் மகத்துவம் அறிந்தவனாய்க்

காட்டிக்கொள்வதற்கு!